Rev 17 | ASO | STEP | Ido' neloti' nene a'mine angelo' seveni lapese seveniu' inite' goloso mili di minave mauti' mali'mo ogo gamazi lo-nemo ti' lo line' ve: Ado' numuno ebe' naba pasidia' vene' ne'mine minine' numuno ado' noso muki' minada minine' numuno nene O'moso'mo lihime emavo mulumo geni geheline' nene gelebizeloze. Ano.

Revelation of John 17

Ebe' Naba Ma Dizo Minine' Nene Pasidia' Vene' Ne'mine minavo Angelo' Mali'mo Zohane'ni Elebizo A'mine Vene' Lihime Imi Di Goloso I-dilizangumu' Lo-imine' Gamazi Zohane' Gizine'

1 Ido' neloti' nene a'mine angelo' seveni lapese seveniu' inite' goloso mili di minave mauti' mali'mo ogo gamazi lo-nemo ti' lo line' ve: Ado' numuno ebe' naba pasidia' vene' ne'mine minine' numuno ado' noso muki' minada minine' numuno nene O'moso'mo lihime emavo mulumo geni geheline' nene gelebizeloze. Ano. 2 A'mine numuno ebeto' medelo minine' vene' nene ado' misubou' misubou' guve'inesi ve nete vi ezesi monovo goloso daa' ani' vene' ne neive. A'mine vene' ne'mo nene ei' monovo've goloso ado' vaini noso ne'mine nene misubou' mini'mi monani' aleve ngimine' ne'mo nene sipaki igi minani' ve. 3 Ne'mine lo-nemo O'moso'mi Sikalahu' ne'mo zatuho' o-nidivo nouvo a'mine angelo' ma'mo nene nele'mize do ebe' hadivela vine' ve. Ne'mine ogavo a'mida ninguvoni' nene vene' ma loposo nite' gulehe' ngenge'ni goloso ma minido' nene mito' neivo ninguve. A'mine loposo nite' ne'mi oko'nolo' nene O'moso do'mo leme-daa' gulive goloso nene vai' goloso neivo godolo nene seveni'a neivo ido' komu've nene teni'a minani' ve. 4 A'mine vene' nene genegana gulehe' ngenge'nisi ido' gumi kala pepoli ve laa' nani' gulehekisi minine' ado' meni've dizo minine' genegana nene ngolo mino ido' gonolise've ato ato' meni've dizo minine' inite' ado' ngolidunu' nehe gulehe' kalehe' gehenidunu' nehe ido' ngalulu' laminedunu' nehe nevo'mine initedunu' nene gonolise ogosa minine' ve. Ido' anau' ngolidunu' lili' ani' kapu ma do miningu' nene vaini noso ne'mino ovozo monovosi pasidia' monovo've golososi nene vai' lo minine' kapu do minine' ve. 5 Ne'mino neivo golihilelo' nene luhuvo gamazi godolo aneza gamaziuti' ti' li gizikani' ve: Pasidia' vene' mukiliti ize'nibosi ido' me misubou' minani' lovozo monovo ato atoliti ize'nibosi minine' ebe' Babelonia numuno ebe' dizo minine' ma ne neive. 6 A'mine Babelonia numuno ebekuti' aleve nete O'moso'mi evenele Izesu' gamazi hizi ele' igi minave nene geli geli igi ngolize izi ngibilika' ngibilika' avo vanise'ine vai' goloso lepani' nenako naza ninguvoni' nene a'mine pasidia' vene' ne'mo vanise'ine nene vaini noso ne'mino geli geli ogo nadi'mo sipaki ine' gelo neivo ninguve.

Naza ningosa vo'ne vaavo gamazi'nesi nomivo minuve. 7 Ne'mino nouvo angelo' ne'mo ti' lo lo-nimive: Gaza gopo gaka nanimu' gelo nane. A'mine veneli'mi monovosi ido' a'mine mito' neine' loposo nite' ado' godolo sevenisi komu've tenisi minine' ne'mi monovosi nene lo ngolo' lo lo-gemelesuve. 8 A'mine noningaine' loposo nite' nene gomu' minosa idise nene minamine'za a'mine hemuvosi nomine' galeseuti' nene dizo hetelelesa neive. Ma dizo heteleline' nene mo sime' naline' akalo' mine molo voloseive. Ido' me misubou' aleve ado' minevo' minevo' ngemeni dameni dalizaveti gulive'ine minaa' neine' buku ado' me misubo soto' idaati' neine' bukuu' gulive'ine nomive ingine a'mine loposo nite' nene ningisa mo vo'ine vavo gopo ga'ine gili minilisave. Ido' vo'ine vavo gopo ga'ine gili minilizani' nene a'mine loposo nite' nene gomu' minosa idise minamo alinge' nene aloseinako nemu' nene ingine mo vo'ine vavo gopo ga'ine gili minilisave. 9 Me gamazi'mi monovo gililizangumu' nene otohato igisa gililizado' o neive. A'mine loposo niteli'mi godolo seveni nene a'mine vene' minaa' neida minani' golo seveni neemu' nene nizave. Ido' ma nene guve'inesi ve naba' naba seveni nemukisi nene nizave. 10 A'mine guve'inesi ve naba engikuti' faef nene mo mini osu' likevo hamo' nene guvelesi ve gono ha do neive. Ido' ma neve nene olihe soto' amive. Olihe soto' amiha ma aline' nene gamene li'nibemukovo' guvelesi ve gono do mineleseive. 11 Ido' a'mine loposo nite' ado' gomu' minosa idise minamive nene a'mine guve'inesi ve sevenilo' imine' molo naba eiti (8) ne'minosa nene neive. Ne neiha aza neve nene a'mine guve'inesi ve seveni engikuti' hamo' neve nene ma mino mo sime' naline' akalo' mine molo neive. 12 Ido' a'mine loposo niteli'mi komu've teni ningaine' nene ingine guve'inesi ve naba' naba tenimu' nene nizave. Ingine olihe guve'inesi ve mini eveneto' gizebo iga' gono api' igi damani'za alinge' a'mine loposo nite' nesi maka' a'mine gono dalizangumu' nene gamene li'nibemukovo' amuzo di mini gono dalisave. 13 Ne'mine igi mini a'mine guve'inesi ve teni ingine hamo' initekovo' ilisa giliisa engi' eveneto' gizebo iga' amuzo'ine nene a'mine loposo initekovo' nene lehizi-dilisave. 14 Ne'mine igisa sipisipi angale nene lovo i imavo lovo hizilisani'za aza nene mo guve'inesi veti guve'inesi ve mino ido' ve naba' nabaliti ve naba'ine neine' nenako aza nene mo ngivile' oloseive. Ido' a'mine lovo hizilizangu' nene eze evenele ve lo O'moso'mo vise lo do kegese-ngidive ado' ezelo' gi'mize lamine' i minave nene ezesi maka' oti minilisave.

15 Ido' ma nene ti' lo lo-nimive: A'mine pasidia' vene' minida noso muki' ningaine' nene evene' ato ato' muki' ado' evene' vai' goloso oko'ine ato atokisi no'ine ato atokisi minado' nene mini milisa nizave. 16 Ido' a'mine loposo niteli'mi komu've teni ningaine' nesi ido' a'mine loposo nite' nesi nene a'mine Babelonia numuno ebeto' medelo minine' pasidia' vene' nene ningi gosele' gehepeve i-dii inite' mata've nene tava li di huli-dii haza bakakovo' huli-mikii a'mingu' minani' aleve muki' nene mo ngibili osu' liisa olo' nedunu' vite' i-dilisave. 17 Ido' ne'mine i-dilizani' nene O'moso'mo mo ne'mine i-dilisave lo gala gele neine' inite' ilizangumu' nene mo lu'ine do ote-ngede neine' nenako ne'mo nene mo ne'mine i-dilisave. A'mine engi' muki' nene hamo' initekovo' ilisa gili minilisaanako ingine guve'inesi ve mini eveneto' gizebo iga' amuzo'ine nene a'mine loposo nite' nene lehizi-dilizangumu' nene lu'ine do ote-ngede neive. Ido' ne'mine o-ngede neinako ei' O'moso'mo line' gamazi nene olihe gihile ize'mo novilingu' nene a'mine loposo nite' nene gelekele' i-di hizi ele' i-di nizavo a'mine O'moso'mo line' gamazi nene ogo gihile ize osu' loloseive. 18 Ido' a'mine vene' ningaine' ma nene numuno ebe' naba misubou' misubou' guve'inesi ve naba' naba gizebo o-ngedo minaa' neine' numuno ebeto' medelo neine' vene' nene ningane.